القصيده :من قصائد الموقع .. ترحيب بالشاعر الكبير/ جمعان خلف
السلام عليكم ورحمة الله وبركاته:
هذه قصيده اهديتها للشاعر العلم/ جمعان خلف الرشيدي
عندما حل علينا بمنتدى الكفه وشرفنا بتواجده معنا.
نويت وبديت وقلت بسم الله الرحمن=ذكرت الله المعبود من دافع ايماني
ذكرته وانا ضايق وحسيت باطمئنان=لأنه بذكره ينخزي كل شيطاني
وبديت القصيده والسبب شفت لي عنوان=يقول ارجو الترحيب تكفون يااخواني
ودخلت احسبه ترحيب عادي وبالمجان=ابهلا مرحبا حييت والوضع مجاني
ولكن لقيته ياسعد غالي الأثمان=ودفعت الثمن شعرن ربى وسط وجداني
قصيدن يشرفني اليا قيل شعر فلان=قصيدن حمل اسمي ورسمي وعنواني
ومادام المرحب فيه شاعر مثل جمعان=فداه القصيد وبحر شعري وقيفاني
على صيبته طير القصايد طلع جوعان=وحول عليها بنقرة(ن) بين ضلعاني
وعلى صيبته تمطر مزون الشعر هتان=وتنبت قوافيها وتخضر الاغصاني
وعلى صيبته يارد قصيدي وهو ضميان=ومن جمته صدر عزيزن وروياني
مع ابو خليفه ينفتح للشعر بيبان=وساحه وملعب للقصايد وميداني
وهلا مرحبا ياسيد الوزن والقيفان=خصوصي ولا ينقال لفلان وفلاني
تراحيب يعقوب بقميصن معه برهان=ورأى النور بعيونه عقب كان عمياني
ورقص منتدى الكفه طرب واشعل النيران=رقص لك وقال اهلا هلا ماانت وحداني
هلا بك هلا بك بين ربعك بني عدنان=وهلا بكل عبسي ينتسب لاصل عدناني
وترانا جميعاً يد وحده هنا واخوان=يداً واحده ويساعد الواحد الثاني
واذا احتجت حاجه اطلب افلان ولا افلان=وتقدم لك الخدمه على حسب الامكاني
وانا ايضاً تحت خدمتك تامرني وتنهان=واذا احتجتني دور عليه وتلقاني
ولك الحب والتقدير والشكر والعرفان=ياشاعر ياكاتب يامثقف ياإنساني
وسلاااااااامتكم
