القصيده :الله على اللي تو مانزل السوق
الله على اللي تو مانزل السوق=الفين سبعه تو نزل مديله
فل اوبشن ولونه تقل لون غرنوق=اصفار طبلونه ولا افتر ويله
وليا مشى ماهو مع الخط مسبوق=مايلحقه مع دربه الا مثيله
بديه جديد ولا لمس بديه اطقوق=وراكد ولا جا فيه هزه وميله
ف اكس ار ونقد ماهو بامفهوق=مايشتريه اللي فلوسه قليله
هو منوت اللي من اهل الدين مزنوق=وحاديه عن حيه سنين طويله
والله كتب له رزق والعبد مرزوق=ارزق بامال(ن)ماحسب له يجيله
ولاحباب عينه قام يسري به الشوق=يبا المنام ولا هتنا نوم ليله
لا داسله كنه مع الخط زاروق=ولوا المسافه مبعده تنطويله
وانا تمنيته ابا سج واتوق=برض(ن)ربيع ومابعد جف سيله
مع ضبطت الفنجال والعمر ملحوق=في خايع(ن)يضيع فيه الدليله
بريت(ن)حماسها ماهو مطفوق=مازاد بالمحماس وزنه وكيله
من خوف لا ياتي بحباتها حروق=وينقد عليه ويعترض للفشيله
ودقه بنجر(ن)عل مايدقه العوق=عسا فداه اموزعين البليله
ولقم بغاديدن بها الذوق مرفوق=بالنار من بين الجمر والنثيله
فنجال يجلا ضيق من ضاق ويروق=لا زايد(ن)بنه ولا زاد هيله
وقدوعها اللي بالطعم حالي الذوق=تمر الخلاص اللي بالاحسا انخيله
وبرض(ن)ربيع وبالسما مزن وبروق=سحابت(ن)تمطر ولا خرى نخيله
ارض(ن)قفر ماداجها قبل مخلوق=ريح الخزامى والنفل في مسيله
نوير عشبه صف ماهو بامفروق=تجلا هموم اللي همومه ثقيله
عشبه طري ماهو من البرد مصوق=لطيف جوه في نهاره وليله
وفيه الزبيدي صدع الارض من فوق=وكل(ن)على ذكر الحبارى يعنيله
والحر فوق الوكر محجوز باسبوق=ولا هد يدفن بالحباري غليله
وحليب خلفات(ن)رعت كل زملوق=حلال رجال(ن)فعوله جزيله
مايشري الا غالي الزمل والنوق=ويمناه ماهي بالكرامه بخيله
مع اخوين كل(ن)يبا الطيب مطبوق=مافيهم اللي تكرهه ماتبيله
ابنا الرجال اللي بها الطيب موثوق=اهل الكرم يوم المعوشه قليله
